VIGAN CITY – Dua a lallaki ti nakemmeg gapu iti panagtakawda manen iti maysa nga store idiay Brgy. Nalasin, Sto Domingo.
Iti pannaki-uman ti Bombo Radyo Vigan ken ni PSSg. Maximino Ramos iti Sto. Domingo Police Station, nabigbig dagiti suspek a da Marvin Ursia Diego, agtawen ti sangapulo ket siam, baro, awan iti trabahona ken ti kaduana a menor de edad nga agpada nga agnaed iti nasao a lugar idinto a ti biktima ket ni Lloyd Torqueza Pere, agtawen ti tallopulo ket walo, naasawaan nga agnaed idiay Brgy. Quimmarayan Sto. Domingo.
Ti insayangkat nga imbestigasyon dagiti pannakabagi ti linteg, kinuna ni Ramos a nabigbig nga insigida dagiti nakakita kadagiti suspek ta datin a nagtakawda iti asideg met laeng iti store ni Pere.
Segun ken ni Ramos, dinadael dagiti suspek iti padlock iti arwangan ti store babaen iti martilyo ket idin nakaunegda, innalada iti sangaribo pito gasut a pisos a sinsilyo nga ibabati ti biktima, dua a botelya iti soymilk, walo nga energy drink, maysa a pakete iti tsokolate ken tallo a ream iti sigarilyo.
Nupay kasta ket maipila iti kaso ken ni Diego idinto a mairekomendar iti DSWD tapno dumalan iti husto a proseso.
