Dua a lallaki ti nakemmeg gapu iti pammagkong idiay Barangay Paratong, Narvacan, Ilocos Sur.
Nabigbig dagiti suspek a da William Palaubsanon Benelito Jr., agtawen iti tallopulo ket uppat, taga-Barangay Lingsat, Sta. Maria ken ni Benelito Escobary Doña, agtawen iti limapulo ket lima, taga-Poblacion Norte, Sta. Lucia.
Ti met biktima ket ni Edison Cordero Martinez, agtawen iti duapulo ket lima, taga-Barangay Turod, Narvacan.
Sinangat dagiti suspek ti biktima nga awan gapgapuna iti sangwanan ti Franks N Burger ket rimsua ti nabara a saritaanda.
Iti dayta a gundaway, pinatalpisan ni Doña ti biktima iti likudan ti ulona ket binagkong met ni Benelito Jr. iti naminsan iti akin-kannigid a kilikilina.
Naipaagas ti biktima iti ospital nga ita ket addan iti natalged a kasasaad.
