Awan ti makita a dati a susik dagiti pannakabagi ti linteg ti Caoayan Police Station kadagiti karaman iti insidente ti pammagkong idiay Barangay Fuerte iti nasao nga ili.
Nabigbig ti suspek a ni William Cabotaje Alconcel, agtawen iti tallopulo ket tallo, taga-Barangay Fuerte, Caoayan idinto a dagiti biktima ket da Joet Barre Prado ken ni Aladin Prado, agtawenda iti duapulo ket siam, ken agpada a taga-Barangay Poblacion, Sta. Catalina.
Iti pannaki-uman ti Bombo Radyo Vigan ken ni Police Captain Giron Oncheta, posible a madi ti nangipapananan ti suspek iti panangtapik ti biktima kenkuana idi gundaway nga agpakadada kalpasan ti panagiinomda ta maipagarup a nadagsen ti imana a nangsipat.
Gapu dayta, nangala ti suspek iti kutsilyo iti pagtaenganda ket binagkongna ni Dela Cruz iti akin-kannawan a paset ti bukotna ken insarunona ti akin-kannawan a pingping ni Prado.
Nagpaarayat dagiti biktima ket babaen kadagiti personnel iti Caoayan Municipal Police Station ken MDRRMO personnel, naipanda iti Ilocos Sur Provincial Hospital Gabriela Silang para iti pannakatamingda idinto a ti suspek ket nakakustodian iti Caoayan Municipal Police Station tapno dumalan iti husto a proseso.
