VIGAN CITY – Agpada a dead on arrival iti ospital dagiti dua a lalaki a pinaltogan ti retired a kameng ti Philippine National Police idiay Barangay Concepcion, Cervantes, Ilocos Sur.
Segun ti Cervantes Municipal Police Station, dagiti biktima ket da Luthgard Lacaden, agtawen iti limapulo ket maysa, naasawaan, negosyante; ken George Guerzon Jr., agtawen iti tallopulo ket walo, baro, laborer nga agpada nga agnaed idiay Barangay Concepcion, Cervantes; idinto a ti suspek ket ni Roberto Urbano, a retired PNP nga agnaed idiay Barangay Concepcion, Cervantes.
Immuna a pinaltogan ni Urbano ni Lacaden ket apaman a napaiddan ket insaruno na ni Guerzon, ket idi gandatenna a kamaten ti asawa ni Lacaden ket nakataray a nakalemmeg iti karruba a pagtaengan.
Nagturong pay ti suspek iti pagtaengan ni Lacaden tapno sapulen ti asawa ti biktima ngem saanna a nakita iti uneg a gappuanan ti panagpaltogna iti uneg iti pagtaengan.
Nupay naipan dagiti biktima iti Ilocos Sur District Hospital Bessang Pass ket naideklararda a dead on arrival babaen ti attending physician-da idinto a ti suspek ket simmukon kadagiti otoridad.
