VIGAN CITY – Dead on arrival dagiti dua a lalaki gapu iti pammaltog idiay Sitio Barbarit, Barangay Cosili East, Bangued, Abra.
Nabigbig dagiti biktima a da Kieft Marty Bona Batalla, agtawen iti duapulo ket maysa, taga-Sta. Rosa, Peñarrubia ken ni Mark Joseph Ramos Tupasi, agtawen iti duapulo ket walo, taga-Barangay Bugbog, Bucay.
Iti pannaki-uman ti Bombo Radyo Vigan ken ni Police Captain Cerel Gaspili, Deputy Chief of Police ti Bangued Municipal Police Station, agin-inom dagiti biktima ken dagiti dua pay a katrabahoanda idi dimteng ti suspek a naggapu iti likudan ti balay a pagiinomanda a pinaltuganna kadagiti biktima.
Nagsagaba iti tama ti paltog ti barukong ken ulo dagiti biktima a naitaray iti ospital ngem saandan a nakalasat.
Caliber 40 ti nausar maibasar iti narekobre a lima a basyo ken maysa a buli manipud iti nakapasamakan ti krimen.
Mapapati a daan a susik ti rason ti pammaltog nga isu ti agtultuloy nga im-imbestigaran dagiti pannakabagi ti linteg kagiddan ti panangsapulda iti suspek.
