VIGAN CITY – Maisagsaganan ti kaso kontra kadagiti dua a suspek a nanglimlimo ken ni Joseph Vibangco, agtawen iti limapulo ket tallo, STL collector, taga-Barangay Bannuar, San Juan.
Nabigbig dagiti suspek a da Jayson Taqueban, agtawen iti tallopulo ket innem, taga-Barangay Cabaruan, Bacarra, Ilocos Norte; ken ni Ryan Dangcil, alyas Siding, agtawen iti uppat a pulo ket tallo a taga-Barangay Sabangan, Sinait.
Nagreklamo ti biktima iti San Juan Police Station ta idi July 23, 2022 iti alas dyes iti agsapa, insalda dagiti suspek ti silver metallic a Honda Civic iti gatad a sangagasut a ribo a pisos.
Gapu iti talek ti biktima ken ni Dangcil, immanamong isuna a maikkan iti short note kas pammaneknek iti transaksyonda nga isu ti naikailanadan iti panangisalda dagiti suspek iti kotse ken madakdakamat a ni Taqueban ti pudno nga akinkukua iti lugan.
Inallukoy ni Dangcil ti biktima nga umanamong iti nasao a short note uray awan ti Car’s proof of Ownership wenno OR/CR.
Sangapulo a ribo a pisos ti dagus a maikissay iti napagtulagan a gatad, kas reward kenkuana ken inkarida a maitedto met laeng kenkuana ti OR/CR.
Gapu dayta, inted ti biktima ti siam a pulo a ribo a pisos ken ni alyas Siding.
Pinadas ti biktima a kontaken dagiti dua a suspek kalpasan ti transaksyon para koma kadagiti papel ti kotse ngem saandan nga inkaskaso agingga a natakuatan ti biktima a saan a ni Taqueban ti pudno nga akinkukua ti lugan.
Maysa a managan iti Gener Pascual a taga-Barangay San Agustin, Laoag City ti nagturong iti San Juan Police Station a mangbigbigbig nga isu ti pudno nga akinkukua iti lugan a naitaray manipud kenkuana nga awan iti pammalubos.
Malaksid dayta, natakuatan pay ni Taqueban a nakemmeg idiay Bacarra, Ilocos Norte gapu met laeng ti nasao a modus operandi.
Nupay kasta, boluntaryon nga insuko ti biktima ti lugan iti pudno nga akinkukua kalpasan ti pannakaiparang kenkuana ti proof of ownership.
