VIGAN CITY – Dua iti nakemmeg idiay Brgy. Pudoc East, Tagudin gapu ti panaglabsingda ti Presidential Decree 449 wenno ti Cockfighting Law.
Iti pannaki-uman ti Bombo Radyo Vigan kenni PEMS Rose Padiwan a MESPO iti Tagudin, nabigbig dagiti suspek a da Cardo Natividad, agtawen ti innem a pulo ket innem, agnaed ti nasao a lugar ken ni Leonardo Mostoles, agtawen ti limapulo ket siam a taga-Brgy. Ipet Sudipen, La Union.
Segun ken ni Natividad, adda pay ti duapulo a kakaduada a nakalibas ta napasungadanda dagiti pannakabagi ti linteg idi naiyuswat ti operasyon.
Manarimaanen iti panang-imbestigarda iti pasamak ta maysa kadagiti nakemmeg ket taga-La Union ta posible a dimmalan ti nagbaetan iti Sudipen, La Union ken Pudoc, Tagudin, Ilocos Sur uray nainget a pagannurutan kas panagannad ti covid-19.
Nupay kasta, naala kadakuada iti dua a piraso ti natay a manok a pangtadi, maysa a manok a sibibiag ken maysa a gaff.
Kabayatanna, dagiti dua a suspek ket addan ti kustodiya dagiti otoridad pakairamanan dagiti naala kadakuada tapno dumalan ti husto a proseso.
