Dua a lalaki ti nakemmeg gapu iti gandatda a panagtakaw ken panagikotda iti mapapati nga iligal a droga idiay Barangay Paguraper, Sto. Domingo, Ilocos Sur.
Iti pannaki-uman ti Bombo Radyo Vigan ken ni PLT. Victorino Harold Baquirin, nadlaw ni Barangay Kagawad Mario Castillo Tabion a tumanaol ti aso ket nasiputanna ti maysa a motorsiklo a nakaparking iti asideg ti water pump a nakaikonektar iti pagmulaanna iti mais ket sinilawanna dagitoy.
Idi kitaenna ti lugar, bigla a timmaray dagiti suspek ngem nalapdan dagitoy babaen iti tulong ti nobio ti anakna.
Iti panangkita dagiti nagresponde a pulis, naduktalan a nagikkat ti goma a mamagsilpo iti water pump ken hose.
Idi makapkapan dagiti suspek, naala kadakuada ti dua a heat-sealed plastic sachet a naglaon iti mapapati a shabu nga agdagsen iti 1.11 grams ken mapatta-patta nga aggatad iti ₱7,548.
Innayon ni Baquirin nga iti damo ket paglibakan dagiti suspek ti inaramidda.
Addan iti kustodia dagiti pannakabagi ti linteg dagiti suspek kabayatan ti pannakaisagana dagiti kaso a maipila kontra kadakuada.
