VIGAN CITY – Maysa a lalaki iti nakemmeg idinto a masapsapul ti kaduana a nagtakaw ti tilapia iti maysa a puttot idiay Brgy. Cabittaogan, Sta. Catalina, Ilocos Sur.
Segun ti Sta. Catalina Municipal Police Station, ti biktima ket ni Don Ace Azada Rabbon, agtawen iti duapulo ket dua, baro ken 3rd year college idinto a dagiti suspek ket da Edward Reotutar Rabaca, naasawaan, construction worker; ken ni Robert Alay-ay Rabaca, agtawen iti tallopulo ket lima, baro, construction worker nga agpapada nga agnaed idiay Brgy. Cabittaogan, Sta. Catalina.
Nagreport ni Rabbon kadagiti pannakabagi ti linteg ta naaktoanna dagiti dua a suspek iti puttotna nga agal-ala iti tilapia babaen ti panagaramatda iti sigay isu a vinideo-na ket impadasna a tiliwen isuda ngem nakalibasda.
Insayangkat dagiti otoridad ti hot pursuit operation iti nasao a lugar a nakakemmegan ni Edward Rabaca idinto a saan a nakita ti kaduana.
Naala kadagiti pagtaengan dagiti suspek ti nabasa a lupotda ken ti bassit a timba nga adda linaonna a maysa a tilapia.
Pinasengkidan met ti biktima a ni Don Ace Rabbon nga ituloy da iti kaso tapno maikkan ti leksyon dagiti nagtakaw ken maaddaan da ti buteng tapno saan da nga uliten iti panagtakaw.
Innayon na pay nga nabayag nga adda mapalpaliiw dan nga adda sabali nga tao idiay puttotda ken saan laeng nga isuda iti mataktakawan da pati dagiti kaabayda a pottot ket mapukpukawan da met laeng.
