Nagdinnungpar ti traysikel ken motorsiklo iti Bonifacio St. corner Gomez St., Barangay IV, Vigan City idi rabii, February 16, 2026 a gappuanan iti pannakadangran dagiti nagmaneho.
Ti nagmaneho iti Kawasaki Bajaj tricycle ket lalaki nga agtawen iti limapulo ket dua, naasawaan, self-employed, addaan ti driver’s license nga agnaed idiay Barangay Bayubay Norte, San Vicente.
Ti nagmaneho met iti Honda Click motorcycle ket agtawen-iti-sangapulo ket walo, awanan trabaho, awanan ti driver’s license, nagaramat ti protective helmet nga agnaed idiay Barangay Fuerte, Caoayan, Ilocos Sur.
Iti pannaki-uman ti Bombo Radyo Vigan ken ni PLt. Marilyn Alcala nga Operations Officer iti Vigan City Police Station, agturong iti laud a direksyon ti tricycle idinto nga agturong iti amianan a direksyon ti motorsiklo a gappuanan iti panagdinnungparda.
Segun ken ni Alcala, saan met a nakaru iti sinagaba dagiti dua a driver ta gasgas laeng iti nadumaduma a paset ti bagi ti sinagrapda ngem naipanda latta iti Ilocos Sur Provincial Hospital-Gabriela Silang para iti pannakatamingda.
No pay kasta ket saan pay a nakapagsarita dagiti dua no kasano dagiti magastos kalpasan iti pannaka-aksidenteda.
