VIGAN CITY – Dua a lalaki ti nakemmeg iti ili ti San Juan ken Magsingal, Ilocos Sur gapu ti kasoda a panaglabsing ti RA 7610 wenno ti Anti-Child Abuse Law.
Immuna a nakemmeg ti Top 2 Municipal Level iti ili ti San Juan a ni Elay Recotoso, agtawen ti duapulo , Grade 12 student a taga-Brgy. Nagsabaran, San Juan babaen ti nagtitipon a pwersa ti San Juan Municipal Police Stataion.
Ti bileg ti warrant of arrest nga inruar ni Hon. Judge Homer Jay Dumlao Rogonjan iti RTC Branch 21, Cabugao, Ilocos Sur a napetsaan idi October 27, 2021 ket nakemmeg ti suspek nga addaan ti dua a bilang ti panaglabsing ti RA 7610 wenno Anti-Child Abuse Law a narekomendaran ti pyansa na nga aggatad ti P200,000 para iti temporaryo a pannakawaya-waya na.
Kabayatanna, nakemmeg pay ni Ronnie Dela Cruz, agtawen ti tallopulo ket maysa, mannalon a taga-Brgy. Santa Monica, Magsingal gapu ti panaglabsingna met laeng ti nasao a kaso nga adda Criminal Case no. 4155-K ken narekomendaran ti P170,000 a gatad para iti temporaryo a pannakawaya-waya na
Agpada a nakakustodiyan dagiti suspek kadagiti pannakabagi ti linteg tapno dumalan ti husto a proseso.
