Nakemmeg iti hot pursuit operation ti maysa a lalaki a suspek iti pammagkong idiay Barangay Baliw Daya, Sta. Maria, Ilocos Sur.
Nabigbig ti suspek a ni Erwin Lamsen Bayuca, agtawen iti duapulo ket walo, taga-Barangay Cabaroan, Sta. Maria.
Dagiti met biktima ket da Mark Dadivas, agtawen iti duapulo ket innem, taga-Barangay Pacang, Sta. Maria ken ti maysa nga agtawen iti sangapulo ket pito a taga-Barangay Silag.
Iti pannaki-uman ti Bombo Radyo Vigan ken ni Police Major Macario Dulawan Jr., aglugan koma ti biktima ken ti maysa a witness iti motorsiklo idin ta immasideg ti suspek ket insawangna ti “Kumaritkayo?!” sa induronna ni Dadivas isu a nagdinnanogda.
Nangasot ti suspek iti kutsilyo ket binagkongna iti namindua a daras ni Dadivas iti tengnged ken tyanna sa insarunona ti menor de edad a binagkong iti akin-kannawan a barukongna.
Linabanan ti menor de edad ti kina-agressibo ti nakainom a suspek isu a naibbatanna ti kutsilyo.
Agpada a naipaagas iti ospital dagiti biktima para iti naan-anay a pannakatamingda.
