VIGAN CITY – Dua a lalaki ti nakemmeg babaen ti hot pursuit operation gapu ti panagprobokarda iti rabii ti Biernes Santo idiay Barangay Lapog Bay Resort, Barangay Sabangan, San Juan.
Nabigbig dagiti suspek a da Elpidio Gorospe, agtawen iti tallopulo ket walo, ken ni Salvador Valle, agtawen iti uppat a pulo ket uppat, agpada a mannalon ken agnaed iti nasao a lugar.
Iti inisyal nga imbestigasyon, nagiinom dagiti suspek iti nasao a resort agingga idi mabartekda ket nakarugida nga agprobokar.
Inanawa ida dagiti staff ti resort ngem impurwakda ti monoblock chair, nagpukkaw ken kinaritda dagiti customer.
Pimmanaw dagiti suspek iti nasao a resort a saanda pay a nabaybayadan ti bill-da nga aggatad iti lima a ribo a pisos.
Nupay kasta, nipan iti San Juan Police Station dagiti suspek tapno maidalanda iti husto a proseso.
