VIGAN CITY – Panaglabsing iti Republic Act 10591 wenno Comprehensive Firearms and Ammunition Act ti sangwen ni Constantino Tababa, agtawen iti uppat a pulo ket pito a taga-Brgy Pussuac ken ni Jomar Burgos, agtawen iti uppat a pulo ket uppat, mekaniko a taga-Brgy Poblacion, Sto. Domingo a natiliwan a nagpaputok iti paltog.
Nagresponde dagiti kameng ti Sto. Domingo Police Station iti napasamak a panagpaputok iti paltog iti kakaykaywan a paset iti daya ti karayan ket nadanunda dagiti suspek pakairamanan dagiti kakaduada a ni Diony Tababa, agtawen iti limapulo ket tallo ken ni Sonny Tababa, agtawen iti limapulo ket maysa nga agiinom iti nasao a lugar.
Impurwak ni Jomar ti homemade cal 22 revolver idinto a ni Constantino ket impurwakna met ti cal 5.56 single shot pistol idi makadlawda nga adda agsangpet a pulis.
Natiliwda ket naipanda iti Gabriela Silang Hospital, Tamag Vigan City para ti medico legal examination sakbay a naipanda iti Sto. Domingo Police Station pakairamanan dagiti naala kadakuada nga ebidensya para ti proper disposition.
