VIGAN CITY – Duapulo a burias a nailugan iti kurong-kurong ti nasalamaan iti Barangay Laslasong Sur, Sta. Maria.
Nabigbig ti nagmaneho iti kurong-kurong a ni Nicolas Zamora, agtawen iti uppat a pulo ket maysa a taga-Barangay Poblacion Norte, iti nasao nga ili.
Pinara ti Sta. Maria Municipal Police Station ti kurong-kurong a nangikarga kadagiti burias ngem idi damagenda ti drayber no ayan ti papelesna ket awan ti maiparangna.
Bayat ti inspeksyon, sabali manen a kurong-kurong ti napasungadan ken pinara dagiti pannakabagi ti linteg ngem linabsan ida ti drayber ket intultuloyna ti nagmaneho tapno makalibas.
Nupay kasta, idi nakita ti drayber ti maikadua a kurong-kurong ti patrol car ti Sta. Maria Police Station, simmabali ti tinurongna ken imbatina iti kamaisan ti kurong-kurong a nangikarga kadagiti uppat a takong.
Iti pannaki-uman ti Bombo Radyo Vigan ken ni Provincial Quarantine Officer Martel Quitoriano,nagpatangda ni Ilocos Sur Provincial Police Office Provincial Director Wilson Doromal tapno mabagaan dagiti hepe ti Narvacan ken Sta. Maria Police Station a bantayanda dagiti dalan a agiliblibas iti baboy nga aggapu iti Abra.
Nagyaman met ti opisial iti nainget a pannakitinnulongda tapnon maisardeng ti panagipastrek dagiti baboy iti probinsia iti baet ti panagraira pay laeng ti African Swine Fever.
Nupay kasta, ti drayber a ni Zamora ken dagiti dua a kurong-kurong pakairamanan ti kargana ket naipan iti Sta. Maria Police Station tapno maidalan iti husto a proseso.
