VIGAN CITY – Maipilaan ti kaso ti maysa a lalaki a nagtakaw ti dua a kalding a napan na inlako idiay Brgy. Puerta Real, Sto. Domingo.
Nabigbig ti suspek a ni Maynard Seguerre agtawen ti uppat a pulo ken agnaed ti Brgy. Maradodon, Cabugao ken ti biktimana a ni Anuario Tinaza agtawen ti lima pulo ket pito agnaed ti Brgy. Camestizoan, Sto. Domingo.
Iti pannaki-uman ti Bombo Radyo Vigan kenni Anuario Tinaza, naduktalanna a mapukpukaw ti dua a kaldingna idi March 23 nga aggatad ti tallo pulo a ribo a pisos agingga a naduktalanda ti kalding ket nailako ti gatad laeng a tallo a ribo a pisos kenni Roque Rapisura.
Innayon ni Tinaza a naamammuna ti suspek idi inrekomendar isuna ti kamammuna nga agburas ti mais ti taltalonna.
Segun kenni PSSg. Maximino Ramos Jr ti Sto. Domingo Municipal Police Station, napaspasda a nasulbar iti nasao nga insidenta babaen iti pannakidamdamag ti biktima ket nabigbigda nga insigida ti suspek a nagpammarang nga adda iti dingwen nga ilaklako na ti nalaka a presyo.
