VIGAN CITY – Sumango iti kaso a panaglabsing iti Republic Act 9165 wenno ti Comprehensive Dangerous Drugs Act of 2002 dagiti dua a nakemmeg iti naiwayat a buy bust operation idiay Brgy. Oiag Daya, Candon City.
Nabigbig dagiti suspek a da Jimroe Galima, agtawen iti duapulo ket tallo nga agnaed idiay Brgy. Patpata 1ST ken ni John Aries Espejo, agtawen iti duapulo ket tallo nga agnaed idiay Brgy. Bagani Togco.
Naala kadakuada ti maysa a medium heat sealed sachet nga aglaon iti mapapati a napagango a bulong ti marijuana, dua a medium heat sealed plastic sachet a naglaon iti napagango a bulong a mapatta-patta nga agdagsen iti 1.1 a gramo a ti DDB value na ket sangaribo sangagasut a pisos, maysa a glass pipe a naglaon iti marijuana buds, maysa a blue lighter, dua a cellphone, maysa a nangisit a wallet, bag, PHP 34,099.25 a kuarta dagiti suspek ken adda pay lima gasut a pisos nga ikot ni Galima.
Naipasidongen dagiti suspek iti Candon City Police Station tapno dumalanda iti husto a proseso.
