VIGAN CITY – Kaso a panaglabsing iti Republic Act 9165 wenno Comprehensive Dangerous Drugs Act of 2002 ti sangwen dagiti dua a suspek iti iligal a droga a nakemmeg iti nagsaruno a buy bust operation idiay Brgy. Oaig, Daya ken Brgy. Bagani Togco, Candon City.
Iti pannaki-uman ti Bombo Radyo Vigan ken ni P/Maj. Napoleon Gao-ay, Deputy Chief iti Candon City Police Station, maysa kadagiti suspek ni Aljon Jimenez, agtawen iti duapulo ket lima nga agnaed idiay Brgy. San Nicolas, Candon City a karaman iti listaan dagiti drug personality.
Naala kenkuana ti maysa a heat-sealed transparent plastic sachet a naglaon iti mapapati a shabu nga isu ti nagserbi a buy bust item; maysa a small plastic sachet a naglaon iti mapapati a shabu nga ikot ti suspek nga agdagsen iti 0.3 gram nga aggatad iti tallo a ribo a pisos; maysa a bassit a pitaka; maysa a kaha ti sigarilyo ken buy bust money.
Kabayatanna, nakemmeg pay ni Lyn Diago, agtawen iti tallopulo ket maysa a tubo iti Cervantes ngem agnaed ita idiay Brgy Bagani Togco, datin nga adda kasona iti iligal a droga.
Naala kenkuana ti maysa a medium heat sealed transparent sachet a naglaon iti mapapati a shabu nga agdagsen iti 0.40 a gramo nga aggatad iti lima a ribo a pisos, cellphone ken dua ribo a pisos a buy bust money.
Nupay kasta, agtultuloy ti operasyon dagiti pannakabagi ti linteg ti Candon City Police Station tapno maduktalan no ania ti pangal-alaan dagiti suspek dagiti shabu a naala kadakuada tapno maparmek ti iligal a droga iti lugarda.
