VIGAN CITY – Agpada a nadundunor ti driver ti motorsiklo ken tricycle gapu iti aksidente a napasamak iti sangwanan ti Brgy. Hall idiay Brgy. Biatalag, Tagudin.
Dagiti karaman iti insidente ket da Marino Valera Valdez, agtawen ti duapulo ket tallo, baro, Public Teacher nga agnaed idiay Brgy. San Julian West, Bantay a nagmaneho iti Yamaha Mio 125 motorcycle idinto a ti nagmaneho ti tricycle ket ni Pablito Ganitog Wattan, agtawen ti uppat a pulo ket innem, naasawaan, tricycle driver nga agnaed idiay Brgy. Suyo Proper, Suyo.
Maibasar ti inisyal nga imbestigasyon, agpapalaud a direksyon ti tricycle idin nagsikko ket aksidente a nadungpar ti nakamotor manipod ti daya a direksyon a gappuanan ti pannakadunorda.
Agpada a naipan idiay Ilocos Sur District Hospital, Brgy. Bio Tagudin dagiti driver para iti pannakatamingda idinto a saan pay nga ammo nu mano ti gatad ti nadadael a paset dagiti luganda.
