Dua ti nadunor iti napasamak nga aksidente iti San Fulgencio Street, Barangay Jardin, Tagudin, Ilocos Sur.
Nabigbig ti nagmaneho iti Honda TMX 125 a motorsiklo a ni Johnrey Lata Lambinicio, agtawen iti uppat a pulo ket tallo, kinalubbonna ni Alfredo Legaspina Peralda, agtawen iti limapulo ket innem, taga-Barangay Bimmanga.
Kabayatanna, ti met nagmaneho iti SYM Bonus X a motorsiklo ket ni Carmelo Aguilan Pagaduan, agtawen iti uppat a pulo ket siam, taga-Barangay Britao.
Agpapadaya dagiti dua a lugan ket idi nadanon ti nakapasamakan ti aksidente, nag-overtake ti Bonus motorcycle iti TMX ket isu ti gundaway a nagsinnagidda.
Nadunor ti abaga ti drayber ti Honda TMX ken saan a naan-ano ti kinalubbonna, idinto a ti drayber ti Bonus ket nadunor ti nadumaduma a paset ti bagina.
Naipaagas dagiti drayber iti ospital para iti naan-anay a pannakatamingna.
Nakainom dagiti karaman ken awan ti suotda a helmet idi mapasamak ti aksidente.
