VIGAN CITY – Dead on arrival ti dua a drayber gapu ti napasamak nga aksidente iti national higway idiay Barangay Barbarit, Magsingal.
Nabigbig dagiti natay a drayber a da Henry Agoot, nagmaneho iti traysikel ken ni Donald James Vintero Bautista, agtawen iti duapulo ket tallo, carwash boy, taga-Baliw, San Juan, nagmaneho iti motorsiklo.
Kabayatanna, karaman pay iti aksidente ti maysa a bus a minaneho ni Edwin Prieto Rondal, agtawen iti limapulo ket maysa.
Maibasar iti CCTV footage, agpapa-amianan ti trayskel idin ta nagsikko ket nadungpar ti bus nga adda iti bangir a linya.
Gapu dayta, ti met motorsiklo nga agpapa-abagatan ket linisyanna ti pasamak ngem saanna metten a nakontrol ti luganna ket naidungpar iti puon ti napukan a kayo.
Iti pannaki-uman ti Bombo Radyo Vigan ken ni Police Captain Rodel Ragasa, napaspas ti panagpataray ti drayber ti motorsiklo ken kunana a mapapati a naggapu a nakiinninom ti nagmaneho iti traysikel.
Naitaray iti ospital ti drayber ti traysikel a naipasirok ken napilidan iti bus ken kasta met ti drayber ti motorsiklo a naitupa ti bagida kadagiti natatadem a kayo ngem dagitoy ket saandan a nakalasat idinto a saan met a naan-ano ti nagmaneho ti bus.
Kabayatanna, naituding met ti panagpapatang ti pamilia dagiti karaman iti aksidente.