VIGAN CITY – Dua ti natay iti panagdinnungpar ti closed van ken trak a nakairamanan pay ti motorsiklo nga adda iti shoulder lane ti kalsada idiay Barangay Gabur Sur, Sta. Cruz, Ilocos Sur a nakairamanan dagiti tallo a lugan.
Ti Fuso truck ket minaneho ni Mariel Collaga Rosal, agtawen iti tallopulo ket walo, taga-Barangay Guam Catablan, Urdaneta City, Pangasinan, inluganna da Arnel Lacadin Inaldo, agtawen iti tallopulo ket tallo, taga-Barangay Lunec, Malasiqui, Pangasinan ken ni Herbert Vadil Bautista, agtawen iti tallopulo ket siam, taga-Barangay #63 Palua, Mangaldan, Pangasinan.
Ti met Fuso closed van ket minaneho ni Michael Delos Santos Saydawan, agtawen iti limapulo ket tallo, taga-Itogon, Baguio City, inluganna ni Mark Johniel Madarang Marzo, agtawen iti duapulo ket pito, taga-Barangay Carcarabasa, San Gabriel, La Union.
Kabayatanna, ti met XRM a motorsiklo ket minaneho ni Rodulfo Hafalla, adda iti husto a tawen, taga-Barangay Paratong, Sta. Cruz.
Agpa-paamianan ti Fuso truck, agpaabagatan met ti Fuso van idinto a ti motorsiklo ket adda iti laud a shoulder ti kalsada a nakasango iti abagatan.
Idi magteng ti nakapasamakan ti insidente, inagaw ti Fuso van ti linya ti Fuso truck ket nagdinnungparda isu a saan a nakontrol ti drayber ti Fuso truck ti manibela ti luganna ket nadunngparna ti motorsiklo sakbay a naidungpara iti sementado nga alad.
Gapu dayta, nagsagaba iti nakaro a dunor ti nagmaneho iti closed van ken motorsiklo idinto a minorinjuries ti sinagaba ti nagmaneho iti Fuso truck ken ti kaduana.
Agpapada a naitarayda iti ospital ngem dead on arrival ti nagmaneho iti closed van ken motorsiklo.
