Nadunor dagiti dua a drayber iti panagdinnungpar ti trak ken kotse iti national highway ti Barangay Poblacion Este, Sta. Cruz, Ilocos Sur.
Nabigbig ti nagmaneho iti mini dump truck a ni Ronniel De Castro Rapera, agtawen iti tallopulo ket maysa, taga-Sagat, Sta. Cruz.
Ti met Silver Nissan Sentra a kotse ket minaneho ni Trincler Sta. Maria Lagmay, agtawen iti duapulo, taga-Tuba, Benguet.
Agpapa-amianan ti trak idin ta agpaabagatan met ti kotse ket idi magtengda ti nakapasamakan ti insidente, immagaw ti linya ti kotse isu a nagdinnungparda iti trak.
Iti pannaki-uman ti Bombo Radyo Vigan ken ni Police Major Vincent Tadeo, aminado ti drayber ti kotse a nakaturog idi mapasamak ti aksidente gapu iti bambannugna.
Naipaagas iti ospital dagiti dua a drayber para iti naan-anay a pannakataming dagiti sinagrapda a dunor.
