Nadunor dagiti drayber iti napasamak a panagdinnungpar ti motorsiklo ken traysikel iti provincial road ti Barangay Pangada, Sta. Catalina, Ilocos Sur.
Nabigbig ti nagmaneho iti motorsiklo a ni Nareza Quiocho Taiza, agtawen iti duapulo ket siam, Barangay Treasurer, taga-Barangay Baggoc, Caoayan, backrider-na ni Jayson Recaido Taiza.
Ti met nagmaneho iti traysikel ket ni Caesar Arquillo Rafanan, agtawen iti tallopulo ket pito, sales agent, taga-Barangay Subec, Sta. Catalina.
Iti pannaki-uman ti Bombo Radyo Vigan ken ni Police Captain Marlon Martinez, agpapadaya ti motorsiklo idinto nga adda iti bangir a linya ti traysikel ket idi nagteng ti nakapasamakan ti aksidente, nag-overtake ti traysikel iti lugan ti sangwananna ket nagdinnungparda ti motorsiklo.
Gapu dayta, nadunor dagiti drayber ken naipaagasda iti ospital para iti naan-anay a pannakatamingda.
