Nadunor dagiti drayber ti motorsiklo ken traysikel a nagdinnungpar iti national highway idiay Barangay San Agustin, Candon City, Ilocos Sur.
Nabigbig ti drayber ti Suzuki Raider 150 a ni Vladimir Candole Gaspar, agtawen iti duapulo ket uppat, agdama nga agnaed iti nasao a lugar.
Ti met Honda TMX tricycle ket minaneho ni Lorenzo Palaso Dapitan Jr., agtawen iti limapulo ket tallo, tricycle driver, taga-Bagar, Candon City.
Iti pannaki-uman ti Bombo Radyo Vigan ken ni PLT. Jovelyn Antalan, agpapa-abagatan ti motorsiklo idin ta bigla a simrek ti traysikel iti linya ti motorsiklo a mapan koma iti paradaanda isu a napasamak ti panagdinnungpar.
Naipaagas iti ospital dagiti dua a drayber para iti naan-anay a pannakatamingda.
Naituding met ti panagpapatang dagiti karaman iti aksidente.
