Dua a drayber ti nadunor gapu iti panagdinnungpar ti minanehoda a motorsiklo iti national highway idiay Barangay Barbarit, Magsingal, Ilocos Sur.
Nabigbig ti nagmaneho iti Suzuki Raider 150 a ni Janzel Reyes Asuncion, agtawen iti sangapulo ket siam, taga-Barangay Sagayaden, Cabugao.
Ti met nagmaneho iti Yamaha Mio 125 ket ni Christina Ursulum Molina, agtawen iti duapulo ket pito, taga-Barangay Macatcatud, Magsingal.
Iti pannaki-uman ti Bombo Radyo Vigan ken ni PLT. Richard Pajo, agpapa-amianan ti Raider idinto nga adda iti bangir a linya ti Mio ket idi nagteng ti nakapasamakan ti insidente, nagsikko nga agpakannigid ti Mio a sumrek iti barangay road idin ta nadungparna ti Raider.
Naipaagas iti ospital dagiti drayber para iti naan-anay a pannakatamingda ket ita, addadan iti natalged a kasasaad.
Awan pay met ti nagpatangan dagiti dua a karaman iti aksidente.
