VIGAN CITY – Agpada a naipaagas iti ospital ti drayber iti motorsiklo ken drayber iti traysikel gapu ti aksidente idiay Barangay Borono, Tagudin.
Ti traysikel ket minaneho ni Thomasito Segui, agtawen iti uppat a pulo ket innem a taga-Barangay. Pattiqui, Santa Cruz idinto a ti motorsiklo ket minaneho ni Trajar Feliciano, agtawen iti tallopulo ket maysa a taga-Tamurong 1st, Candon City.
Agpada nga agpapa-abagatan a direksyon dagiti dua a lugan idin ta nag-overtake ti motorsiklo ket bigla met nga inawid ti drayber ti traysikel ti luganna nga agpakannigid a gapuanan ti pannakaidungparna iti nag-overtake a motorsiklo.
Nagsagaba iti dunor dagiti dua a drayber a naipan iti Ilocos Sur District Hospital Bio, Tagudin para ti naan-anay a pannakatamingda.
