Nadangran dagiti dua a drayber ti motorsiklo iti napasamak nga aksidente idiay Barangay Vacunero, Sto. Domingo, Ilocos Sur.
Ti Honda Click 160 a motorsiklo ket minaneho ti maysa nga agtawen-iti-sangapulo ket pito, Grade 11 student, awan driver’s license-na ken helmet, agnaed iti nasao nga ili.
Ti met Honda Click 125 a motorsiklo ket minaneho ni Joel Tactay Jaramillo, agtawen iti uppat a pulo ket pito, awan ti helmet-na, taga-Barangay Paras, Sto. Domingo.
Agpapa-amianan ti motorsiklo a minaneho ti menor de edad ket idi makadanon iti intersection, nagmaniobra a nagpakannigid ti motorsiklo a minaneho ni Jaramillo nga aggapu iti bangir a linya ket naidungpar iti motorsiklo a minaneho ti menor de edad.
Gapu dayta, natukkol ti saka ken nadunor ti ulo ni Jaramillo idinto a ti menor de edad ket nadunor ti nadumaduma a paset ti bagina.
Naipaagasda iti ospital para iti naan-anay a pannakatamingda
