VIGAN CITY – Dua a drayber ken maysa a backrider ti nadunor iti panagdinnungpar ti kurong kurong ken motorsiklo iti Barangay Danuman East, Sta. Maria, Ilocos Sur.
Menor de edad dagiti nagkalugan iti Yamaha Aerox a motorsiklo, agpada nga awan ti helmetna ken taga-Barangay Lingsat, Sta. Maria.
Ti met kurong-kurong ket minaneho ni Gilbert Berbano Ventura, agtawen iti tallopulo, construction worker, taga-Barangay Danuman East, Sta. Maria.
Maibasar iti imbestigasyon, aggapu iti daya nga agpalaud ti motorsiklo idinto nga adda iti outer lane ti kurong kurong.
Idi madanunda ti nakapasamakan ti insidente, rimuar manipud outer lane ti kurong-kurong ket nagdinnungparda ti napaspas ti tarayna a motorsiklo.
Nadunor dagiti dua a drayber ken ti backrider a naipaagas iti ospital para ti naan-anay a pannakatamingda.
Natakuatan a ti drayber ti kurong-kurong ket nakainom idi mapasamak ti insidente.
