Naduktalan ni Barreiros Mayor Carlinhos da Pedreira iti Brazil dagiti dua a doktor a naka-duty nga agkadua iti maysa a siled idinto nga adu a pasyente ti agur-uray iti serbisio medical.
Napasamak ti insidente iti Jailton Messias de Albuquerque Municipal Hospital idi nangisayangkat ti mayor ti surprise inspection gapu kadagiti reklamo iti nabayag a panaguray dagiti pasyente.
Gapu dayta, kiniddaw ti mayor a papanawen dagiti dua a doktor ken ayaban ti kapulisan, idinto a lineppas ti lokal a gobierno ti kontratana iti organisasion a mangimatmaton iti ospital.
Kabayatanna, kinondenar ti Pernambuco Regional Medical Council ti pampubliko a panangibabain kadagiti doktor ket impaganetgetda a nasken nga idalan iti legal ken institusional a proseso ti ania man nga imbestigasion iti mapapati a panaglabsing.
