Dua a dati a drug surrenderee a naaktuan nga agpo-pot session ti nakemmeg idiay Barangay Elefante, Banayoyo, Ilocos Sur.
Nabigbig dagiti suspek a da Michael Aglibut Garnace, agtawen iti tallopulo ket dua, taga-Barangay Lintic, Banayoyo ken ni Jerry Jasper Baduyen Ballocanag, agtawen iti duapulo ket tallo, taga-Barangay Elefante, Banayoyo.
Iti pannaki-uman ti Bombo Radyo Vigan ken ni PLT. Rahanie Garnace, Officer in Charge ti Banayoyo Police Station, maysa a concerned citizen ti nangitawag kadakuada nga adda maar-aramid a pot session iti lugar ket nadanon met dagiti pannakabagi ti linteg dagiti suspek nga agar-aramat iti iligal a droga iti sirok ti kayo ti mangga.
Innayonna a sinublian manen dagiti ti iligal nga aramidda bayat iti inda panangmonitor kadakuada.
Nakumpiskar ti 0.1 gram ti mapapati a shabu nga aggatad iti P680 a naikabil iti maysa a piraso ti heat-sealed transparent plastic ken maysa a glass tube a naaramat a toother a mapapati nga adda shabu residue-na.
Dagiti non-drug evidence ket pakairamanan ti dua a cellphone, dua a piraso ti 50-peso bill ken motorsiklo.
Sangwen dagiti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
