Dua a construction worker ti tinagbat ti kaubraanda iti maipatpatakder a coliseum iti Tamag, Vigan City, Ilocos Sur.
Dagiti biktima ket agtawen iti tallopulo ket pito, ken tallopulo idinto a ti suspek ket agtawen iti uppat a pulo ket maysa, agpapada a taga-Nueva Vizcaya ngem aggigyanda iti construction site ti maipatpatakder a coliseum.
Iti pannaki-uman ti Bombo Radyo Vigan ken ni PLT. Amado Somera, nagiinom ti suspek ken dagiti biktima iti kabaybayan idiay Fuerte, Caoayan idin ta rimsua ti saanda a pagkikinnaawatan.
Dayta ket gapu ta ti biktima nga agtawen iti tallopulo ket nasukalanna ti nobiana nga adda ar-aramidenda a sabali iti suspek.
Idi makasublida iti barracks-da iti siudad ti Vigan, nagsinnungbatda manen ket nangala ti suspek iti buneng ket tinagbatna dagiti biktima.
Nadunor ti akin-kannigid a takyag ti biktima nga agtawen iti tallopulo ket pito idinto nga iti met akin-kannigid a dakulap ti nadunor iti biktima nga agtawen iti tallopulo.
Nakemmeg ti suspek ken narekobre ti buneng a nausar a 20.5 inches ti rukodna agraman ti apputanna.
