VIGAN CITY – Ibilang dagiti kameng ti Sto. Domingo municipal police station a persons of interest dagiti dua a caretaker iti pagtaengan ni Domingo Ped Rayray idiay Barangay Nambaran iti napasamak a panagtakawan idi June 4.
Ngem, inlawlawag met ni Police Captain Christopher Ramat, hepe ti Sto. Domingo police station a dagiti persons of interest ket saan a maibilang a suspek ngem ketdi isuda laeng iti pangrugyan iti imbestigasyon da.
Innala dagiti saan pay nabigbig a suspek iti pagtaengan ni Rayray na adda itatta idiay California iti sangapulo ket tallo ribo a dolyar wennu nasurok nga innem a gasut ket pito pulo ribo a pisos a nakaikabil iti maysa a safety vault a nakadulin iti maysa kadagiti tallo a kwarto iti pagtaengan.
Kabayatanna, awan pay laeng met iti persons of interest ti Vigan City police station iti panagtakawan a napasamak idiay Pantay Daya idi naminsan nga aldaw ta segun ken ni Vigan City police station chief investigator- Police Chief Master Sergeant Chester Dandin ket manarimaan pay laeng iti naun-uneg nga imbestigasyon da inaig iti nasao nga insidente.
Dagiti naala iti pagtaengan ti biktima a ni Victor Carbiga Chan ket tubong a naglaon iti lima pulo ribo a pisos, remington cal. 22 ken pearl earrings nga aggatad iti sangagasut a ribo a pisos.
