Nangitunda iti pannakadadael dagiti sumagmamano a pagtaengan ken kayo ti alipugpog a nangduprak iti Barangay Manaboc ken Barangay Bangbangar, Burgos, Ilocos Sur.
Segun iti Burgos Municipal Police Station, bayat ti panangisayangkat dagiti kapulisan iti situational report iti kada barangay babaen iti hand held radio, impakaammo kadakuada dagiti barangay official nga adda alipugpog a dimmuprak kadagiti barangay.
Nagresponde met nga insigida dagiti pannakabagi ti linteg kaduada ti Municipal Disaster Risk Reduction and Management Office (MDRRMO) tapno iberipika ti report.
Idi makasangpetda iti lugar, nakita dagiti nagresponde a nadadael ti atep dagiti sumagmamano a pagtaengan, agraman dagiti dadduma a garahe, idinto nga adda pay nabual a kayo gapu iti napigsa nga angin.
Dagus a tinulongan dagiti awtoridad dagiti agindeg nga agbakwit ken kumamang iti nataltalged a lugar kasta payen a nangisayangkatda iti clearing operations.
Awan ti nadunor kadagiti dua a barangay gapu iti insidente, ngem agtultuloy latta ti panangmonitor dagiti maseknan iti sitwasion ken ti kasasaad dagiti agindeg iti lugar.
