Nakemmeg dagiti dua a babai a nagtakaw iti kalding iti Barangay San Sebastian, San Vicente, Ilocos Sur.
Nabigbig dagiti suspek a da Janice Alcantara Rodriguez, agtawen iti tallopulo ket walo, taga-Barangay Polo, San Carlos City, Pangasinan ngem aggigyan iti Barangay Bulala, Vigan City ken ni Premadona Santos Singson, agtawen iti uppat a pulo ket tallo, online seller, taga-Barangay Ayusan Norte, Vigan City.
Ti met biktima ket ni Archie Noves Romena, agtawen iti uppat a pulo ket dua, taga-Barangay San Sebastian, San Vicente.
Nagreport ti biktima iti San Vicente Police Station nga iti alas otso y media iti bigat ti Agosto 30, napanna kinita dagiti tarakenna a kalding iti nagiwaywayanna ngem natakuatanna a mapukpukaw.
Dua a turo ti mapukpukaw, ken maysa ti babai nga agpapada nga agmaris iti white ken brown, aggatad met iti nasurok kumurang PHP38,500.
Nangisayangkat ti San Vicente Police Station iti follow-up investigation ket naduktalanda a dagiti suspek ken inlakoda iti maysa a taga-Ayusan Norte isu a napakaamoan ti biktima ket kunana a kukuana dagiti kalding ken maatap a natakaw.
Iggemen dagiti pannakabagi ti linteg dagiti suspek pakairamanan dagiti natakaw a kalding para iti naan-anay nga imbestigasyon.
