VIGAN CITY – Dua nga agibugbugaw ti bagida ti nakemmeg iti naiwayat nga entrapment operation iti TnT Lodging Inn idiay Barangay Darapidap, Candon City.
Nangiwayat dagiti pannakabagi ti linteg iti entrapment operation kontra kadagiti suspek ket sakbay ti operation, maysa a managan iti alyas Mary Ann Mata iti agsapsapul iti kliyentena para iti sexual service kasukat iti PHP2,500 iti tunggal maysa.
Segun iti maysa a suspek, adda dagiti babbai nga ammona a mangayat iti sexual pleasure kasukat iti PHP2,500 kada maysa ket iti dayta a gundaway, naiwayat ti entrapment operation kontra iti subject person ket napagtulaganda ti agsarak.
Iti lodging inn, nagpayam-ammo dagiti dua a babbai iti operating team a dagitoy ket PHP5,000 ti bayadda kasukat ti sexual intercourse.
Kalpasan ti transaction, naawat ti maysa a babai iti entrapment money a PHP5,000 ket simrekda kadagiti kuarto ti nasao a lodging inn.
Iti dayta a gundaway, dagus met a nagtignay ti operating team ket kinemmegda dagiti suspek.
Naala manipud iti maysa a babai ti maysa a piraso ti brown sling bag a naglaon iti tallo piraso ti sangaribo a pisos nga entrapment boodle money; uppat a PHP500 nga entrapment genuine money; cellphone; pitaka a naglaon iti PHP450 a personal money; ken maysa nga ID.
Naala met manipud iti maysa pay a suspek ti maysa a brown sling bag a naglaon iti voter’s certificate; pitaka a naglaon iti barya; maysa a wallet a naglaon iti ID; ken maysa a cellphone.
Nupay kasta, isagsaganan ti Candon City Police Station dagiti dokumento para iti pannakaipila ti kaso kontra kadagiti suspek.
