Nagpalagip ti Department of Trade and Industry-Ilocos Sur kadagiti konsyumer no ania dagiti nasken a kitaen a naimbag sakbay a gumatang kadagiti online shop.
Dayta ket kagiddan ti panangrambak ita a bulan iti Consumer Welfare Awareness Month.
Iti pannaki-uman ti Bombo Radyo Vigan ken ni Genevive Waklin, Senior Trade and Industry Development Specialist, masapul a kitaen ti maysa a konsyumer ti product reviews, legitimacy ti online shop, product restriction, ken return policy sakbay a gumatang iti produkto a mailaklako.
Malaksid dayta, nasaysayaat pay no idulin dagiti screenshot ken proof of transaction.
Tapno met maliklikan ti scam, nasken a saan nga ited ti OTP no adda dagiti shop nga agkiddaw nga umuna iti bayad sakbay a sumangpet ti produkto.
Nupay kasta, balakad ni Waklin kadagiti konsyumer nga agbalin a naridam kadagiti gatangen – online man wenno iti physical store ken ammuen dagiti karbengan kas maysa a konsyumer.
