VIGAN CITY – Impasigurado ni DTI-Ilocos Sur Provincial Director Charie Quadra Quodala nga amin nga agtagilako iti probinsia ket sumursurot kadagiti nayetnag a pammilin kangrunaan iti suggested retail price dagiti basic necessities ken school supply.
Kinunana a kaaduan pay ketdi kadagiti agtagilako iti school supply ket ilakoda dagiti produktoda iti nababbaba ngem ti naituding nga SRP.
Bigbigen ti opisial a daytoy ket resulta ti kanayon a panangbisbisitada kadagiti pagtagilakuan ken panagmonitorda iti presyo.
No met maipanggep iti panagsangpet ti suplay ket makanay, regular nga agsangpet ken saan a madeldelay.
Nupay kasta, dagiti aglabsing iti naituding a presyo dagiti basic necessities ket dagus a maipatulodan iti showcause order agsipud ta adda ti maipatpatungpal a price freeze gapu ti kalkalpas a bagyo.
Ngem no saan a naidalan iti price freeze ket mapatulodan pay nga umuna iti letter of inquiry.
