VIGAN CITY – Agtultuloy ti panangmonitor ti Department of Trade and Industry-Ilocos Sur iti presyo ken suplay ti basic ken prime commodities nangruna kadagiti dadakkel a pagtagilakuan iti probinsia.
Iti pannaki-uman ti Bombo Radyo Vigan ken ni Senior Trade and Indsutry Specialist Annabelle Polanco, iti naudi a monitoring-da ket nakita met a sumursurot iti suggested retail price dagiti establisimiento.
Adda met sumagmamano a nagtalinaed iti dati a suggested retail price-da kagiddan ti pannakairuar ti baro nga SRP.
Kabayatanna, impasiguradona nga iti inda panaglikmot iti abagatan a paset ti probinsia tapno makita met ti status dagiti school supply ket masursurot ti SRP dagiti nadumaduma a brands.
Innayon ni Polanco a dagiti saan a sumursurot a pagtagilakuan kadagiti maipatungpal nga SRP ket mapatulodanda iti letter of inquiry tapno mailawlawag dagiti itudtudingda a presyo.
Nupay kasta, balakad ti opisial kadagiti aggatang nga usarenda ti karbenganda a pilien no ania ti paglakaan ken kapkapnekanda kadagiti magatang.