Nangisayangkat iti training ti Department of Social Welfare and Development – Sustainable Livelihood Program wenno DSWD-SLP, kaduada ti Tiktok Shop Philippines para kadagiti benepisyaryo ti programa iti Luzon ita nga aldaw idiay Vigan City Convention Center.
Gagem ti programa a masurwan dagiti SLP participant no kasano nga aramaten ti digital platform iti panangi-promote dagiti produktoda iti online selling.
Naawagan a “Tara, Live Sell na! DSWD x Tiktok Shop Unlad Lokal Roadshow ti aktibidad a paset iti programa ti DSWD tapno paregtaen ti pagbiagan dagiti benepisyaryo babaen iti digital technology ken e-commerce.
Nasurok 200 a participant ti dimmar-ay iti training agraman dagiti SLP association manipud iti nadumaduma a paset ti Luzon.
Kagiddan ti training ti maysa a pop-up bazaar a pakakitaan ken pakailakwan dagiti SLP association dagiti produktoda.
Segun iti DSWD, maisayangkat pay ti isu met laeng a training para kadagiti SLP participant idiay Visayas ken Mindanao kadagiti sumaruno a bulan.
