Umaboten iti nasurok PhP1.9 million a tulong, pakairamanan dagiti taraon ken dadduma pay a kasapulan, ti naipatulod ti Department of Social Welfare and Development (DSWD) kadagiti pamilia a naapektaran ti Bagyo Tino idiay Bicol, Central Visayas, ken CARAGA Regions.
Segun ken ni DSWD Assistant Secretary Irene Dumlao, manamnama a manayonan apy ti gatad ti tulong gapu ta agtultuloy latta ti imbestigasion dagiti DSWD field office maipanggep iti sitwasion kadagiti lugarda.
Malaksid kadagiti taraon ken dadduma pay a kasapulan, nangipatulod payen ti ahensia ti mobile kitchen iti Matnog Port idiay Sorsogon tapno mangipaay ti nabara a taraon kadagiti stranded individual.
Iti agdama, 53,570 a pamilia wenno 175,531 nga indibidual ti adda iti 2,156 evacuation centers idiay MIMAROPA, Western Visayas, Negros Island Region, Central Visayas, Eastern Visayas, ken CARAGA regions; idinto 20,565 a pamilia wenno 65,571 a tattao ti temporario nga agnanaed kadagiti kabagianda wenno gagayyemda. Augie Arellano
