Naka-full alert ti Department of Social Welfare and Development para iti Tropical Storm Nando, a manamnama nga agbalin a ‘super typhoon’ iti sumaruno a lawas, ken naisaganan ti 2.6 milion food packs iti intero a pagilian para kadagiti maapektaran a lugar.
Segun ken ni DSWD Assistant Secretary Irene Dumlao, nakasaganan dagiti food packs iti nadumaduma a bodega iti intero a pagilian.
Nasurok 2.27 milion a gatad ti food packs ken non-food items ti naited kadagiti agindeg a naapektaran iti Tropical Depression Mirasol iti Ilocos Region, Cagayan Valley, Central Luzon, Bicol Region, Western Visayas, ken Cordillera Administrative Region.
Pinasingkedan ti PAGASA a ti bagyo ket mabalin a dumalan iti asideg wenno ag-landfall iti Babuyan Islands iti nagbaetan ti Lunes iti malem agingga Martes iti agsapa, sakbay a rummuar iti Philippine area of responsibility inton Martes iti aldaw wenno malem.
