Ipangrunan ti Department of Social Welfare ti panagaramat iti guarantee letters imbes a cash assistance para iti medical needs kalpasan a nadlaw nga adda sumagmamano a benepisyaryo a gasgastusenda ti ayuda iti nadumaduma a pagkasapulan malaksid iti panagpaagas.
Segun ken ni DSWD Crisis Intervention Program Director Edwin Morata, gagem daytoy a panagbalbaliw iti salinong ti Assistance to Individuals in Crisis Situations program a masigurado a maaramat ti ayuda iti husto a gagem ken maksayan ti posibilidad ti panangloko.
Iti salinong ti guarantee letter system, direkta a baybayadan ti DSWD dagiti accredited hospital, pharmacies, diagnostic centers ken dadduma pay a healthcare providers imbes nga ited ti tulong kas cash.
Agingga Mayo 31, nakaiteden ti DSWD ti saan a nababbaba ngem iti P9.22 billion a medical ken funeral assistance kadagiti 499,978 a benepisyaryo babaen iti guarantee letters iti salinong ti AICS program.
