Pinasingkedan ni PCapt. Ramil Llarenas a hepe ti Cabugao Municipal Police Station a nakurang a makabulan a sipsipotan da ti nakemmeg a suspek iti naiwayat nga anti-illegal drug operation idiay Brgy. Pug-os iti nasao nga ili.
Segun kenni Llarenas, newly identified ti suspek a drug pusher ken user a ni Jayson Rey Arcalas, agtawen ti tallo pulo ket walo, naasawaan, awanan trabaho nga agnaed idiay Brgy, Baglic, Cabugao a nakemmeg idi kalman babaen iti panagtitinnulong dagiti pannakabagi iti linteg.
Naala kenkuana iti maysa a transparent heat sealed plastic sachet nga aglaon iti mapapati a shabu nga isu iti buy bust item, dua a transparent heat sealed plastic sachet a naglaon iti mapapati a shabuken uppat a rolled aluminum foil nga agdagsen iti 0.3 a gramo nga aggatad ti sangapulo ket uppat a ribo a pisos agingga sangapulo ket lima a ribo a pisos.
Naduktalan pay dagiti otoridad a masansan a pappapanan ti suspek ket idiay Brgy. Baclig, Brgy. Pug-os ken Brgy. Quezon nga ayan dagiti gagayyemna.
Kabayatanna, pinalagipan ni Llarenas dagiti agindeg iti panangsurot iti paganurutan itatta general community quarantine ta mabalin a mamuelta dagiti aglabsing.
