VIGAN CITY – Nakemmeg babaen iti naiwayat a buy bust operation idiay Barangay Barangobong, Sta. Lucia ni Joseph Pinpin Crisologo, agtawen iti uppat a pulo ket tallo, tricycle driver nga agnaed iti Barangay Ayusan, Sta. Lucia.
Naaktauan ti suspek nga agilaklako iti maysa a heat sealed transparent plastic sachet a naglaon iti mapapati a shabu nga isu ti nagserbi a buy bust item.
Naala pay manipud iti ikot ti suspek ti dua a heat-sealed transparent plastic sachet ti shabu, dua nga open plastic sachet, maysa a small blue plastic straw, maysa a genuine one-thousand-peso bill a nagserbi a buy bust money, maysa a metal container, ken cellphone.
Agdagsen iti maysa a gramo ti shabu nga aggatad iti tallo ribo lima gasut a pisos.
Iti pannaki-uman ti Bombo Radyo Vigan ken ni Police Major Roger Baling-oay Jr., mangidaulo iti Sta. Lucia Police Station, nabayag nga inmonmonitorda ti suspek gapu ti panagilaklakona iti iligal a droga iti ili ti Sta. Lucia ken siudad iti Candon.
Nupay kasta, sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
