VIGAN CITY – Nakemmeg iti buy bust operation ni Isagani Corpuz, agtawen iti duapulo ket siam, karpentero a taga-Barangay Katipunan, Sinait ken nailista a kas Street Level Individual.
Naaktuan ti suspek nga agilaklako iti dua a small heat-sealed transparent plastic sachet a naglaon iti mapapati a shabu a naibungon iti white face mask nga isu ti nagserbi a buy bust item.
Naala manipud iti ikot ti suspek ti maysa a small plastic container a naglaon iti dua a heat-sealed transparent plastic sachet ti mapapati a shabu; lighter; PHP1K a buy bust money; maysa a coin purse a naglaon iti PHP2,306; maysa a cellphone; ken maysa a motorsiklo.
Dagiti naala a shabu ket nasurok kumurang .4grams nga aggatad iti PHP2,720.
Segun ken ni Police Major Franco Catalan, dua a bulan a sinipsiputanda ti suspek gapu ti panagilakona iti iligal a droga iti ili ti Sinait ken kadagiti kabangibangna nga ili.
Innayon ni Catalan a paglibakan ti suspek ti aramidna ngem maidalanto latta iti drug testing.
Nupay kasta, naipanen ti suspek iti Sinait Police Station ket sangwenna ti kaso a panaglabsing iti Republic Act 9165 wenno Comprehensive Dangerous Drugs Act of 2002.
