VIGAN CITY – Kaso a panaglabsing iti Republic Act 9165 wenno Comprehensive Dangerous Drugs Act of 2002 ti sangwen ti maysa a drug suspect idiay Brgy Patong, Magsingal a nakemmeg babaen iti search warant.
Ti search warrant nga imbanag dagiti pannakabagi ti linteg ket imparuar ni Judge Homer Jay Ragonjan, Presiding Judge iti Regional Trial Court Branch, Cabugao a napetsaan iti October 12, 2020.
Naala manipud iti pagtaengan ti suspek ti uppat a heat sealed plastic sachet iti mapapati a napagango a marijuana a mapatta-patta a sangapulo ket lima a gramo a ti DDV na ket aggatad iti innem a gasut pitopulo ket lima a pisos ken addaan iti street value a dua ribo pito gasut a pisos.
Malaksid ti dayta, adda pay naala a sangapulo ket dua a bala ti caliber 9MM a paltog, uppat a piraso a bala ti 5.56 MM, tallopulo ket walo a piraso iti empty shell ti caliber 45 ken maysa a fired bullet iti caliber 45 isu a posible a mapilaan pay ti panaglabsing iti RA 10591 wenno ti Firearms and Ammunition Act.
