VIGAN CITY – Kaso a panaglabsing ti Comprehensive Dangerous Drugs Act ti sangwen ni Jeremy Bisnar alyas Jimboy, agtawen ti dua pulo ket innem, mannalon ken agnaed idiay Sitio Baugen, Brgy. Balidbid, Salcedo a nakemmeg iti naiwayat a buy bust operation iti nasao a lugar
Segun ken ni P/Capt. Mark Lagman, hepe ti Salcedo municipal police station, naala ken ni Bisnar ti dua a transparent heat sealed plastic sachet a naglaon ti shabu nga isu ti nagserbi a buy bust item, pito a transparent heat sealed sachet a naglaon iti maatap a shabu nga ikotna nga agdagsen ti walo a gramo ken aggatad ti lima a ribo uppat a gasut uppat a pulo a pisos (PHP 5, 440) , maysa nga aluminum foil, bassit a pouch ken tallo a lighter.
Nabayagen a sinipsiputan dagiti kameng ti linteg ti suspek ta maysa isuna a high value target ken drug surrenderee a nagturpos ti community – based rehabilitation program (CBRP) ngem nagsubli iti iligal nga aramid.
Ti agdama, ikot dagiti kameng ti Salcedo PNP ti suspek para iti proper disposition.
