Nakemmeg ti maysa a dishwasher iti naiwayat a buy-bust operation iti San Ildefonso, Ilocos Sur.
Iti pannaki-uman ti Bombo Radyo Vigan ken ni Police Captain Joseph Fieldad manipud iti San Ildefonso Police Station, ti suspek nga agtawen iti tallopulo ket lima, agnaed iti ili ti Sta. Catalina ket maysa nga Street Level Individual, dati a drug surrenderee idi panawen ti Oplan Tokhang ken naidalan iti Drug Rehabilitation.
Innayon ni Fieldad a ti Metro Vigan ti lugar a pangisaysayangkatan ti suspek ti operasyonna ken manarimaan ti panangimbestigarda no sadino ti paggapgapuan dagiti iligal a droga.
Naala manipud iti suspek ti nasurok-kumurang 0.60 grams ti mapapati a shabu nga aggatad iti P4,080 a naikabil iti lima a heat-sealed transparent plastic sachet.
Dagiti non-drug evidence ket pakairamanan ti maysa a genuine P1,000 bill, cellphone, pitaka, puspuro, tallo nga ID, wallet, ken 36 a 1-peso coins.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
