Maysa a drug surrenderee ti nakemmeg idiay Barangay Jordan, Sinait, Ilocos Sur, maibilbilang a Drug Cleared Barangay.
Ti suspek ket agtawen iti tallopulo ket uppat, construction worker ken mannalon, tubo iti nasao a lugar ngem aggigyan idiay Ilocos Norte.
Iti pannaki-uman ti Bombo Radyo Vigan ken ni PLT. Elmer Asistin, Deputy Chief of Police ti Sinait Police Station, ti suspek a Top 17 iti Regional Target List ken maysa a High Value Individual ket agop-operate iti probinsia ti Ilocos Sur ken Ilocos Norte.
Malaksid iti panagilaklakona iti iligal a droga, maysa pay isuna nga agus-usar.
Sinipsiputan dagiti pannakabagi ti linteg ti panagsubli ti iligal nga aramid ti suspek agingga a naiwayat ti buy-bust operation a nakakumpiskaran ti tallopulo a gramo ti maatap a shabu nga aggatad iti P204,0000 a naikabil iti dua a piraso ti heat sealed transparent plastic sachet.
Dagiti met non-drug evidence a naala ket pakairamanan ti maysa a genuine P1,000 a buy-bust money, sangapulo ket tallo a piraso ti machine copied a P1,000 a boodle money, cellhpone, facemask a nausar a pangbungon kadagiti shabu ken motorsiklo.
Sangwen ti suspek ti kaso a panaglabsing iti RA 9165 wenno Comprehensive Dangerous Drugs Act of 2002.
